უშედეგოდ დასრულდა შეხვედრა გაფიცულ მაღაროელებსა და „ჯორჯიან მანგანეზს“ შორის
უშედეგოდ დასრულდა შეხვედრა გაფიცულ მაღაროელებსა და კომპანია „ჯორჯიან მანგანეზის“ წარმომადგენლებს შორის, რომელიც 2 დეკემბერს კომპანიის ოფისში ოთხი საათის განმავლობაში მიმდინარეობდა. მოლაპარაკებების შემდეგი რაუნდი სამშაბათს, 5 დეკემბერს ჩატარდება.
ჭიათურაში დარკვეთის მაღაროს თანამშრომლები უკვე მესამე დღეა გაფიცულები არიან და სამუშაოს შესრულებაზე უარს ამბობენ. ამ ეტაპზე გაჩერებულია 13 მაღარო.
მაღაროელების მოთხოვნა 12-საათიან სამუშაო გრაფიკზე, ე.წ. ვახტურ რეჟიმზე გადასვლაა - ეს თვეში 15 დღე მუშაობას გულისხმობს. მაღაროელები ანაზღაურების გაზრდასაც მოითხოვენ, თუმცა, მათი თქმით, კომპანია "ჯორჯიან მანგანეზი" ამ მოთხოვნის დაკმაყოფილებაზე უარს აცხადებს.
ერთ-ერთი მაღაროელის განცხადებით, ე.წ. ვახტურ რეჟიმზე გადაყვანას დამსაქმებელი ჯერ კიდევ 5 თვის წინ დათანხმდა მათ, თუმცა პირობა შეუსრულებელი დარჩა.