Ақтөбе облысы: Шалқарда оқушы айдаған көлік жол апатына ұшырап, бір бала қаза болды
Ақтөбе облысының Шалқар қаласында мектеп оқушылары мінген көлік жол апатына ұшырап, балалардың бірі қаза болды. Тағы бір оқушы қыз хәл үстінде жатыр.
Оқиға 4 наурыз күні кешкі ондар шамасында Шалқар қаласында болған. Тас жолдан ауып кеткен көлікте Шалқардағы №8 мектептің 2007-2008 жылы туған бес оқушысы болған.
Шалқар аудандық ауруханасы бас дәрігерінің орынбасары Еркебұлан Әбдіғалиевтің сөзінше, жол апатынан соң реанимацияға түскен 2007 жылғы қыз баланың жағдайы өте ауыр. Ашық ми жарақатын алған оқушы жасанды тыныс алу аппаратына қосылған.
- Сүйектері сынған екі оқушы Ақтөбедегі облыстық балалар ауруханасына жіберілді. Үшінші баланың жағдайы қанағаттанарлық болғандықтан үйінде емделіп жатыр, -деп хабарлады Еркебұлан Әбдіғалиев.
Шалқар аудандық білім бөлімінің басшысы Қази Орынтайұлының сөзінше, апатқа ұшыраған көлікте үш ер бала мен екі қыз бала болған. Оқиға орнында қайтыс болған қыз бала 2007 жылы туған.
- Ата-ана баласының үйде жоқ екенін, гараждағы көлікті айдап әкеткенін мұғалім хабарласқаннан кейін бір білген. Күн сайын кешкі сағат 21:00 мен 23:00 аралығында сынып жетекшілері қауіпсіздік үшін оқушыларға, ата-аналарына хабарласып отырады. Жол апатына ұшыраған оқушылар кеше кешкілік мұғалімнің қоңырауына жауап бермеген, - дейді Қази Орынтайұлы.
Ақтөбе полициясының мәліметінше, оқиға 4 наурыз күні сағат 20:55 шамасында облыстық маңызы бар Шалқар-Бозой тас жолының төртінші шақырымында болған. Toyota Land Cruiser көлігін басқарып келе жатқан кәмелетке толмаған жаөспірім көлік тізгініне ие бола алмай, аударылып кеткен деп хабарлады полиция.