Елордада алғаш рет ревматология орталығы ашылды
Елордада алғашқы ревматология орталығы ашылды. Енді науқастар ұзақ кезек күтпей-ақ, ауруханаға жатып емделе алады, деп хабарлайды елорда әкімдігінің ресми сайты.
Ревматология орталығы «Қалалық көпсалалы фтизиопульмонология және ішкі аурулар» орталығында ашылды.
– Бұл орталықтың ашылуы – Астанадағы денсаулық сақтау жүйесін дамыту үшін маңызды кезең. Бұған дейін қалада ревматология саласы бойынша мамандандырылған стационар бөлімше жоқ еді. Енді буын ауруына шалдыққан науқастарға медициналық көмек қолжетімді болады. Ем қабылдау үшін күту мерзімі қысқарып, заманауи ем-дом тәсілдері қолданылады, — деді орталық басшысы Анна Цепке.
Бұған дейін науқастар 6-7 ай кезек күтетін еді.
Осыған дейінгі қалыпты ахуалдың салдарынан науқас ауруханаға жату үшін алты-жеті айға дейін кезек күтуге мәжбүр болды; науқастар көбіне шұғыл жағдай бойынша ауруханаға түсті; базистік және гендік-инженерлік биологиялық терапияны уақытылы тағайындау мүмкіндігі шектелді.
– Емдеуді ұзақ күтуден ауру асқынып, науқастың мүгедектігі артуы мүмкін. Жаңа ревматология орталығы осы мәселелерді жүйелі түрде шешуге бағытталған, — деп хабарлады қалалық қоғамдық денсаулық сақтау басқармасы.
Ревматология орталығының ашылуы мамандандырылған стационарлық көмектің қолжетімді болуына, ауруханаға жату мен кеңес алуды күту мерзімін қысқартуға, заманауи ем-домды уақытылы тағайындап, науқастың денсаулығын оңалтуға, аурудың ауыр және асқынған түрін азайтуға, емдеу кезінде дәрігерлердің мультидисциплинар тәсілін пайдалануына, науқастардың өмір сүру сапасы арттыруға ықпал етеді.
Ревматика ауруы – буын мен бұлшық етке қатысты созылмалы дерт. Ревматика ауруына емдеу үшін ерте диагностика мен тұрақты бақылау, сондай-ақ заманауи ем-дом тағайындау қажет.
Айта кетсек, бұдан бұрын ІІМ госпиталінде полиция қызметкерлеріне арналған оңалту орталығы ашылғанын хабарлағанбыз.
Сообщение Елордада алғаш рет ревматология орталығы ашылды появились сначала на ZhambylNews АҚПАРАТ АГЕНТТІГІ - Жамбыл облысы жаңалықтары.