Ғалымдар ақырзаман қашан болатынын есептеп шығарды
Ғалымдар Жер бетінде тіршілік қанша уақыт сақталуы мүмкін екенін есептеп көрді. Зерттеу нәтижесіне сәйкес, планетадағы өсімдіктер биосферасы әлі шамамен 1,8 миллиард жыл өмір сүруі мүмкін. Бұл туралы Daily Mail басылымы зерттеу нәтижелеріне сілтеме жасап жазды, - деп хабарлайды Tengri Life.
Зерттеу барысында Колорадо университетінің Боулдердегі кампусы мен Сиэтлдегі Blue Marble Space компаниясының мамандары үш өлшемді климат моделін пайдаланған. Бұл модель ауа температурасының, бұлттың, жауын-шашынның, мұхиттардың жай-күйі мен атмосфера айналымының өзгерісін ескеруге мүмкіндік береді. Ғалымдар осы деректер негізінде алдағы екі миллиард жылда Жер климаты қалай өзгеруі мүмкін екенін модельдеген.
Жұмыс авторларының сөзінше, Күннің қартаюына қарай оның жарығы біртіндеп арта береді. Соның салдарынан Жердегі температура көтеріле түседі де, өсімдіктерге фотосинтез үшін қажет көмірқышқыл газының мөлшері азаяды. Аяғында бұл өсімдіктердің басым бөлігінің жойылуына әкеп соғады. Кейін құрғақшылыққа төзімді түрлер, соның ішінде кактустар мен фотосинтездің ерекше түрін пайдаланатын өсімдіктер ғана тірі қалуы мүмкін.
Ғалымдар екі түрлі сценарийді қарастырған. Біріншісі - кейбір тау жыныстарының көмірқышқыл газын сіңіруіне байланысты оның атмосферадағы мөлшері біртіндеп азаюы. Бұл процесс табиғи үгілу немесе минерал карбонизация деп аталады. Екінші сценарий бойынша атмосферадағы көміртек мөлшері шамамен бір деңгейде сақталады, ал негізгі әсер етуші фактор ретінде ауа температурасының көтерілуі қарастырылады.
Есептеулерге сүйенсек, Жердегі өсімдіктер биосферасы шамамен 1,8 миллиард жылға дейін сақталуы мүмкін. Бұл бұған дейінгі бірқатар зерттеуде айтылған болжамдардан әлдеқайда ұзақ. Осы мерзімнен кейін Күннің жарығы одан әрі артып, соның салдарынан Жер мұхиттарынан айырыла бастайды. Нәтижесінде планета тіршілікке жарамсыз күйге түсуі мүмкін.
Сонымен қатар, зерттеу авторлары бұл модельде өсімдіктердің болашақтағы эволюциясы мен адамзаттың ықтимал технологиялық жетістіктері ескерілмегенін атап өтті. Ғалымдардың пікірінше, мұндай факторлар биосфераның қанша уақыт сақталатынына әсер етуі мүмкін.
Зерттеушілер өсімдіктердің жаңа жағдайға бейімделуі, ал тіршіліктің атмосфераның жоғарғы қабаттарына, тіпті Жерден тыс кеңістікке таралуы теориялық тұрғыдан мүмкін екенін жоққа шығармайды. Бұдан бөлек, ғалымдар Күн сәулесінің әсерін жасанды түрде азайтудың түрлі жолдарын да қарастырып жатыр. Алайда мұндай технологиялардың салдары әзірге толық зерттелмеген.