Сүлейменов базалық мөлшерлемені одан әрі төмендету шартын атады
Ұлттық банк төрағасы Тимур Сүлейменов Қазақстанда базалық мөлшерлеме қандай жағдайда 16 пайызға дейін төмендеуі мүмкін екенін айтты, - деп хабарлайды Tengrinews.kz тілшісі.
Оның айтуынша, инфляция бұдан әрі баяуласа, мұндай сценарийдің жүзеге асуы әбден мүмкін.
"Болжам жасау әрдайым қиын. Дегенмен алға қойылған міндет пен қолымыздан келетін істерге сүйенсек, инфляция 9–9,5 пайызға дейін баяулаған жағдайда, қалыпты қатаң ақша-несие саясаты базалық мөлшерлемені шамамен 16 пайыз деңгейінде ұстап тұруды көздейді", - деді Сүлейменов.
Сонымен қатар Ұлттық банк басшысы ақша-несие саясатын одан әрі жеңілдетуге кедергі болуы мүмкін бірқатар фактор барын баса айтты.
Ол мұндай факторлардың қатарына мұнай және азық-түлік нарықтарындағы тұрақсыздықты жатқызды. Сонымен қатар, оның сөзінше, әлі толық көрініс таппаған ішкі факторлар да бар. Атап айтқанда, тарифтік реформаның қалай жүзеге асатынын және халықтың инфляциялық күтулері қалай өзгеретінін бақылау қажет.
Сондай-ақ Сүлейменов квазифискалдық ынталандыру (экономиканы мемлекеттік қолдау шаралары) параметрлері бойынша үкімет және "Бәйтерек" холдингімен қол жеткізілген уағдаластықтарды оң фактор ретінде атап өтті.
Оның айтуынша, қаржы жүйесіндегі ақшаның несие беруге бағытталуы және даму институттарының жұмысы қосымша ақша массасының пайда болуына (қосымша ақша шығаруға) әкелмеуі маңызды.
"Егер "Бәйтерек" іс жүзінде келісілген параметрлерді сақтаса, инфляцияға әсері минималды болады деп есептейміз. Бұл, сөзсіз, оң факторлардың бірі", - деді Ұлттық банк төрағасы.
Базалық мөлшерлеме
24 шілдеде Ұлттық банк базалық мөлшерлемені 17-ден 16,75 пайызға дейін төмендетті. Реттеуші бұл шешімін жылдық инфляцияның тоғыз ай қатарынан төмендеп, маусымда 10,3 пайыз болғанымен түсіндірді.
Бұл ретте Ұлттық банк тәуекелдер теңгерімі әлі де проинфляциялық күйде қалып отырғанын атап өтті. Алдағы шешімдер инфляцияның бәсеңдеуі қаншалықты тұрақты болатынына, ішкі сұраныс серпініне, тарифтік саясатқа, әлемдік шикізат нарықтарындағы жағдайға, сондай-ақ бюджет параметрлері мен экономиканы мемлекеттік қолдау шараларының сақталуына байланысты болады.