Бақыт Есімова Президент Әкімшілігінде қызметке тағайындалды
Бақыт Есімова Президенті Әкімшілігінің Өтініштерді қарауды бақылау бөлімінің меңгерушісі болып тағайындалды, - деп хабарлайды Tengrinews.kz тілшісі Ақордаға сілтеме жасап.
"Мемлекет басшысының өкімімен Бақыт Амангелдіқызы Есімова Қазақстан Республикасы Президенті Әкімшілігінің Өтініштерді қарауды бақылау бөлімінің меңгерушісі лауазымына тағайындалды", - делінген хабарламада.
Бақыт Есімованың өмірбаяны
Бақыт Есімова 1984 жылы 29 қаңтарда Павлодар облысы Баянауыл ауданы Майқайың ауылында дүниеге келген. Санкт-Петербург мемлекеттік инженерлік-экономикалық университетін және Калифорния университетін (АҚШ) бітірген.
Еңбек жолын 2006 жылы Қазақстан жастар конгресінде бастады, онда менеджер және атқарушы директорға дейінгі аппарат басшысы қызметтерін атқарды.
2007 жылдан 2008 жылға дейін "Сауда саясатын дамыту орталығы" АҚ-да сарапшы болды.
2008 жылдан 2010 жылға дейін Қазақстан Республикасы Мемлекеттік қызмет істері агенттігінде Стратегиялық жоспарлау және қоғаммен байланыс бөлімінің бастығы қызметін атқарды.
2010 жылдың наурызында Ақмола облысына ауысып, Жұмыспен қамту және әлеуметтік бағдарламаларды үйлестіру департаменті бастығының орынбасары болды. 2011 жылдың наурызында ол осы департаменттің басшысы болып тағайындалды және бұл қызметті 2013 жылдың маусымына дейін атқарды.
2013 жылдың 28 маусымынан 2015 жылға дейін Ақмола облысы әкімінің аппарат басшысы қызметін атқарды.
2015 жылы Астана қаласының ішкі саясат департаментін басқарды және бұл қызметті 2020 жылдың қыркүйегіне дейін атқарды.
2020 жылдың қыркүйегінен 2022 жылдың мамырына дейін Қостанай облысы әкімінің орынбасары қызметін атқарды.
2022 жылдың мамырынан бастап Президент әкімшілігінің Өтініштерді қарауды бақылау бөлімі меңгерушісінің орынбасары қызметін атқарды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!