Алдымен блэкаут, енді дауыл мен нөсер: Канье Уэст концерті алдында Алматыда не болып жатыр?

Алматы биылғы жаздың басты концерттерінің бірі өтетін күні Канье Уэсттің жанкүйерлерін сынап жатқандай. Алдымен қалада жарық өшсе, кешке әртістің өнер көрсетуіне санаулы сағат қалғанда ауа райы күрт бұзылды: Алматыда екпінді жел соғып, нөсер жауды. Соған қарамастан, жұрт Орталық стадион маңына жиналып жатыр, деп хабарлайды Tengrinews.kz тілшісі.
Алдымен Алматыда жарық жаппай өшті
14 тамызда күндіз Алматының бірнеше ауданында электр энергиясы сөніп қалды. Қаланың әр бөлігін қамтыған ауқымды жарық іркілістері туралы хабарланды.
Бұл жағдай әлеуметтік желілерде тез арада күннің басты тақырыбына айналды. Блэкаут тура 14 тамызда - Канье Уэсттің Алматыдағы алғашқы үлкен концерті өтетін күні болғандықтан, қолданушылар бұл екі оқиғаны бірден байланыстырды.
"Мұны Канье өшіріп тастаған", "Канье аппаратураны тексеруді жөн көрген", "Ол әлі сахнаға шықпай жатып шоу жасап үлгерді" - қазақстандықтар жарықтың өшуін америкалық рэпердің келуімен байланыстырып, қалжыңдасты.
Кейін жағдай реттеле бастады. Алматыда электр қуатын беру кезең-кезеңімен қалпына келтірілді - түрлі аудан тұрғындары жарықтың қосылғанын хабарлады.
Алматыда концерт алдындағы "шытырман оқиға" осымен бітетіндей көрінген. Бірақ бұған ауа райы араласты.
Нөсер мен екпінді жел
14 тамыз кешке Алматыда ауа райы күрт бұзылды. Қалада нөсер жауып, жел күшейді.

Кадрлардан жаңбырдың шелектеп құйып тұрғанын, желдің ағаштарды шайқап, көшелерде су ағып жатқанын көруге болады.

Қолайсыз ауа райы көрермендер Ye концертіне Орталық стадионға қарай жаппай ағылған кезде басталды.
Әртістің көптеген жанкүйері су болды. Адамдар күрте жамылып, капюшондарын киіп, жаңбырдан қашып, қолдарына не іліксе, сонымен басын жауып жатыр. Нөсер мен желге қарамастан, стадионға бет алған жұрттың қарасы көп.

Оқиға орнында жүрген Tengrinews.kz тілшісі ауа райының қолайсыздығына қарамастан, жұрттың көңіл-күйі көтеріңкі екенін хабарлады. Жиналғандар өзара араласып, күліп, болған жайтты телефондарына түсіріп, шоудың басталуын күтіп тұр. Стадион маңындағы ахуалға қарағанда, көрермендер жаңбырға бола тарап кететін емес.
Бұған дейін стадион үшін талас та болды
Блэкаут пен нөсер - Канье Уэсттің Алматыға келуімен байланысты алғашқы қиындықтар емес.
Концерт туралы 17 шілдеде белгілі болды. Өнер көрсету Алматының Орталық стадионында 14 тамызға белгіленді. Алдағы концерт туралы ақпаратты кейін әкімдік растады.
Бірден "Қайрат" футбол клубымен дау туындады. Клуб өкілдері концерт күні командамен келісілмегенін мәлімдеді. "Қайрат" өз алаңындағы матчтерін Орталық стадионда өткізеді, ал тамызда команда еурокубоктардағы өнерін жалғастырып жатқан болатын. Сондай-ақ клубтағылар ауқымды сахнаның құрылысы мен бөлшектелуі газонның жағдайына әсер етуі мүмкін деп қауіптенді.
Осы жағдайға байланысты ұйымдастырушылар билеттер сатылымын бір тәулікке - 20-сынан 21 шілдеге ауыстырды. Бұл ретте олар концерт бұрынғыша 14 тамызда Орталық стадионда өтетінін хабарлады.
Ақыры стадион Канье Уэстке бұйырды. "Қайрат" УЕФА еурокубоктардың үшінші іріктеу кезеңіндегі ықтимал үйдегі матчін басқа жаққа ауыстыру туралы өтініш білдірді. Кездесуді "Түркістан Аренада" өткізу мақұлданды.
Көптен күткен концерт бәрібір өтеді
Бір айға жуық талқылаудан, стадион төңірегіндегі даудан және билеттер сатылымының кешігуінен кейін концерт күні де келіп жетті.
14 тамызда Канье Уэст әлемдік тур аясында Алматының Орталық стадионында сахнаға шығуы тиіс. Қала үшін бұл Ye-нің алғашқы үлкен концерті. Бұған дейін әртіс Қазақстанда болған, бірақ бұл жерде стадионда көпшілік алдында толыққанды өнер көрсетпеген. Алматыдағы концерт оның 2026 жылғы әлемдік турының бөлігі ретінде жарияланды.
Егер басында жанкүйерлер концерттің Орталық стадионда өтер-өтпесіне алаңдаса, бүгін бұған блэкаут, қатты жел мен нөсер қосылды.
Бірақ стадион маңына жұрт әлі де жиналып жатыр. Олар жаңбыр астында, күрте жамылып, Канье Уэсттің шығуын күтіп тұр.