Алматыда рейдтен кейін 300-ге жуық самокат арнайы тұраққа қойылды
Өткен демалыс күндері Алматыда полиция жол қозғалысы ережелерінің сақталуын бақылауды күшейтті. Рейд ең алдымен өрескел заңбұзушылықтарды анықтауға, жол-көлік оқиғаларының алдын алуға және жеке мобильділік құралдары - самокаттар, мопедтер мен электрвелосипедтерді бақылауға бағытталды, деп хабарлайды Tengri Auto.
Алматы прокуратурасының мәліметінше, бір тәулік ішінде 1 542 жол қозғалысы ережесін бұзу дерегі анықталды. Оның ішінде 185-і жол қозғалысына қатысушылардың өмірі мен денсаулығына жоғары қауіп төндіретін өрескел заңбұзушылықтар санатына жатқызылды.
Атап айтқанда, полицейлер автокөлікті мас күйінде басқарудың сегіз дерегін, қарсы бағытқа шығудың жеті жағдайын және маневр жасау ережелерін бұзудың, соның ішінде жолақты қауіпті ауыстырудың 76 фактісін анықтады.
Бұдан бөлек, 68 жүргізуші мен жолаушы қауіпсіздік белдігін тақпаған, 24 автокөлік иесі рөлде отырып ұялы телефон пайдаланған. Тағы екі жағдайда жалған мемлекеттік тіркеу нөмірлері тағылған көліктер анықталды.
Тексеріс қорытындысы бойынша 20 автокөлік мамандандырылған айыптұраққа жөнелтілді.
Мопедтер мен скутерлер жіті бақылауда
Рейд кезінде мотоцикл мен жеке мобильділік құралдарына ерекше көңіл бөлінді.
Мәселен, Жетісу ауданында полицейлер жол қозғалысы ережесін бұзудың 152 дерегін, соның ішінде көлікті пайдалану және жолаушылар тасымалдау ережелеріне қатысты заңбұзушылықтарды анықтады.
Тексеріс нәтижесінде мамандандырылған тұрақтарға 298 скутер, үш мопед, бір мотоцикл және бір электрвелосипед қойылды.
Полиция қозғалыс қарқынды учаскелер мен жол-көлік оқиғалары жиі болатын орындарға басымдық берілетінін атап өтті.
"Бақылау шаралары тұрақты негізде, әсіресе қозғалыс тығыздығы мен апат деңгейі жоғары учаскелерде жалғасады. Жүргізушілерді жол қозғалысы ережелерін қатаң сақтауға, өз өмірі мен айналасындағылардың қауіпсіздігіне қатер төндірмеуге шақырамыз", - деп түйіндеді Алматы Полиция департаменті бастығының орынбасары Ғалым Сарғұлов.
Жүргізушілерге жол ережесін сақтау, қауіпті маневрден бас тарту және өздері мен өзге қозғалыс қатысушыларын қауіп-қатерге итермелемеу туралы ескерту жасалды.