Екі алтын және рекорд: қазақстандықтар Чехиядағы турнирде айрықша өнер көрсетті
Жарыстың алғашқы күні 22 жастағы Васильев жеңімпаз атанды. Ол екі мүмкіндіктің қорытындысы бойынша 258,4 ұпай жинап, аустриялық Якоб Штайнбергер (236,6) мен польшалық Ян Галицадан (236,3) озып кетті. Қазақстанның тағы бір өкілі Илья Мизерных төртінші орынға табан тіреді (231,3).
Екінші күні қос қазақстандық бірдей тұғыр биігінен көрінді: Мизерных 267,4 ұпаймен алтын еншілесе, Васильев 259,8 ұпаймен күміс жүлдегер атанды. Қола жүлде аустриялық Якоб Штайнбергерге (244,5) бұйырды.
Айта кетейік, Данил Васильев жеңіске жеткен сәтте 109 метрге секіріп, трамплиннің жаңа рекордын орнатты.
"Бүгін таңертең оянып, әкеме хабарластым. Ол маған бұл жердегі рекорд 107 метр екенін айтты. Мен оған жаңа рекорд орнататынымды жеткіздім. Солай болды да. Секірістер сәтті шықты – трамплин де, жел де өте жақсы болды", - деді қазақстандық спортшы тарихи нәтижеден кейін.
Instagram-дағы бұл жарияланымды көру
skoky.net (@skoky_net) жариялаған жазба
Мизерных пен Васильев туралы не белгілі?
Айта кететін жайт, Илья да, Данил де қазақстандық шаңғымен секіру спортының тарихына еніп үлгерген.
Мизерных өткен Олимпиадада бағдарламаның осы түрі бойынша ел өкілдері арасындағы ең үздік нәтижені көрсетіп, сегізінші орын алған болатын.
Instagram-дағы бұл жарияланымды көру
илья мизерных (@ilya_mizernykh) жариялаған жазба
Ал Васильевке келетін болсақ, ол Польшаның Висла қаласында өткен Гран-при кезеңінде күміс жүлдеге ие болды – бұл мұндай деңгейдегі жарыстардағы Қазақстанның алғашқы жүлдесі.
Бұған дейін шаңғымен трамплиннен секіруден Қазақстан құрамасының мүшелері стадионда "кенеттен тұрғызылған сахнаның" кесірінен жаттығудың өтпей қалғанын айтқан болатын.