Ақтаулық сарбаздың ата-анасы ауруханаға түскен ұлын әскерден алып кетпек

Ақтаудан шақыртылған 18 жастағы сарбаз Ақтөбеде ауруханаға түсті. Оның туыстарының айтуынша, № 6655 әскери бөліміндегі сержанттар сарбазды ауруханаға түсер алдында бірнеше рет соққыға жыққан. Сарбаздың өзі полицияға арызданып, сотқа дейінгі тергеу басталды. Енді ата-анасы ұлын әрі қарайғы қызметтен босатуды сұрап отыр, деп хабарлайды Tengrinews.kz тілшісі.
3 қыркүйекте Еркебұлан Досымбет кіші дәретке шығудың қиындауына байланысты Ақтөбе облыстық көпсалалы ауруханасына жатқызылды. Мерзімді қызметтегі сарбаздың ата-анасы ұлының ауруханаға түскенін кездейсоқ білген. Отбасы бірден Ақтаудан Ақтөбеге барды.

"Қазір оның жағдайы нашар – катетер қойылған, өздігінен дәретке шыға алмайды. Көзі шүңірейіп кеткен. Ол сержанттар ұрып-соққанын, ара-тұра соққы астына алғанын айтады. Камера жоқ каптеркаға алып барып, сол жерде ұрған", – деді сарбаздың анасы Гүлдана Кетібаева Tengrinews.kz тілшісіне.

Жас жігіт өздігінен кіші дәретке шыға алмай қалған соң дәрігерлерге жүгінген. Мамандар бұл ақау алған жарақаттан болуы мүмкін екенін жоққа шығармайды.

"Тексеру және анамнез жинау кезінде пациент жарақат алғаны анықталды. Ауруханаға түскен сәтте оның жағдайы орташа ауырлық дәрежесінде бағаланды. Анамнезге сүйенсек, ауру қуық қызметінің уақытша бұзылуына әкеп соққан жарақатпен байланысты болуы мүмкін. Көп жағдайда бұл соққы мен жарақаттарға қатысты", – деді Ақтөбе облыстық көпсалалы ауруханасы бас дәрігерінің орынбасары Әділбек Исмайылов.

Еркебұлан Досымбет № 6655 әскери бөліміне үш ай бұрын келген. Туыстары жас жігіт әскерге өз еркімен барып, Ақтаудан шақыртылғанын айтады. Қазір сарбаздың арызы бойынша сотқа дейінгі тергеу басталды.
"Қатардағы жауынгер Еркебұлан Досымбет Данилович 3 қыркүйекте Ақтөбе облыстық көпсалалы ауруханасына "бақылаудағы цистит" алдын ала диагнозымен жатқызылды. 4 қыркүйекте ол полицияға арыз түсірді. Батыс өңірлік әскери-тергеу басқармасының әскери-тергеу бөлімі Қылмыстық кодекстің 451-бабы, 1-бөлігі "Билікті немесе лауазымдық өкілеттікті асыра пайдалану" бойынша қылмыстық іс қозғады. 5 қыркүйекте Ақтөбеге Ұлттық ұланның "Батыс" өңірлік қолбасшылығының қолбасшысы мен арнайы комиссия келді. Кешенді іс-шаралар мен қызметтік тексеріс жүргізіліп жатыр", - деді № 6655 әскери бөлімі командирінің орынбасары Төлеген Тұрақбаев.
Материалды дайындау барысында Tengrinews.kz тілшісіне өзін сержант Ерболат Зуадинов деп таныстырған әскери бөлім қызметкері телефон шалды. Ол сарбаз жанжалды өзі тудырғанын алға тартып, Еркебұлан Досымбеттің бұйрыққа бағынбағаны түсірілген видеоны жіберді.
Сарбаздың туыстары бұл нұсқамен келіспейді. Олар ұлдары ешқашан агрессия көрсетпегенін айтып, оның қазіргі жағдайына алаңдаулы.

"Мен енді ұлымды бұл бөлімде қалдыра алмаймын. Оның үстіне астигматизмі бар, көзі минус төрт. Мен оның әскерден босатылғанын қалаймын. Ұлымның өзі де бұл жерде қалғысы келмейді. Оның алдағы жай-күйіне қорқамыз. Қазір оның психологиялық жағдайы ауыр", – деді сарбаздың әкесі Данил Досымбаев.

Ата-анасы ұлдарын басқа бөлімге ауыстыруға немесе қызметтен мүлдем босатуға қол жеткізбекші. Соққыға жығу дерегінің мән-жайын қазір тергеу тобы мен Ұлттық ұланның арнайы комиссиясы анықтап жатыр.
Ақтаулық сарбаз Ақтөбедегі әскери бөлімде соққыға жығылғанын айтты
Еске сала кетейік, бұған дейін әскери қызметші Еркебұлан Досымбет видео жариялап, онда сержанттардың өзін ара-тұра ұрып-соққанын айтып, анасымен сөйлескенде олардың аты-жөнін атаған. Үш әскери қызметшіге қатысты қылмыстық іс қозғалды, олардың әскери бөлімдегі қазіргі мәртебесі нақтыланбады.