Астанада жаңа ереже енгізілмек: қарбалас уақытта жолда не істеуге болмайды?

Астанада көше тазалау жұмыстары жаңа ереже бойынша жүргізілмек. Тиісті мәселе елорданың Қоғамдық кеңес отырысында қаралды, деп хабарлайды Tengrinews.kz тілшісі.
Жолда не істеуге тыйым салынады?
Жаңа ережеде күндізгі қарбалас уақытта жолды механикалық тәсілмен тазалауға тыйым салу ұсынылып отыр. Сондай-ақ арнайы техникаға күндізгі уақытта жол жиегіндегі жасыл желекті суаруға тыйым салынады – суару жұмыстары бекітілген кесте бойынша жүргізіледі.
Бұдан бөлек, мердігерлер брусчатканың, жасыл желектердің, көше жиһаздары мен жарықтандыру құралдарының сақталуына материалдық тұрғыдан жауапты болады. Сондай-ақ ережелер қатарында:

Салмағы 3,5 тоннадан асатын ауыр арнайы техниканың тротуарларға, жаяу жүргіншілер аймағына және брусчатка төселген аялдамаларға шығуына тыйым салу.
Қыс мезгілінде балалар және спорт алаңдарын қардан тек қолмен тазалау.
Брусчаткадағы мұзды ойып тазалауға және көгалдардағы қарды жинауға немесе шығаруға тыйым салынады.

Қазіргі уақытта ережелер талқылау сатысында. Олар күшіне енуі үшін Астана мәслихатының депутаттары мен тиісті инстанциялар тарапынан қаралып, мақұлдануы тиіс.
Неге бұл мәселе тудырып отыр?
Астанада қарбалас уақытта тазалық техникасы кейде жүргізушілерге қосымша қолайсыздық келтіреді. Машиналар жолдың бір бөлігін алып, қозғалысты баяулатуы, әсіресе көлік көп жүретін учаскелерде кептеліс тудыруы мүмкін.
Айта кетейік, биыл ақпанда мәслихат отырыстарының бірінде депутат Талғат Дүйсеков қоғамдық орындарда қар мен мұзды тазалау тәсілін өзгертуді ұсынған болатын. Оның пікірінше, тротуарларды асфальтқа немесе брусчаткаға дейін толық тазарту міндетті емес - адам жүретін жолдарды аршыған жеткілікті. Депутаттың айтуынша, мұндай тәсіл бюджетті үнемдеуге және жол жабынын сақтауға мүмкіндік береді.