“Мерзімі өтіп, адамдар қайтыс болған“. Ұлдана Мырзуанның ісіне қатысты жаңа құжаттар

Астанада фельдшер Ұлдана Мырзуанның қазасына қатысты сот процесі жалғасып жатыр. Бүгін прокурор Нұрдәулет Әбуов қылмыстық іс материалдарына бірқатар құжатты қосып, сот отырысында зерттеуді сұрады, деп хабарлайды Tengrinews.kz тілшісі.
Мемлекеттік айыптаушы қорғау тарапы үйді басқару органдарының бұрынғы басшылары мен құрылыс салушының жауапкершілігі туралы мәселені бірнеше рет көтергенін атап өтті.

"Қылмыстық іс жағдайларын толық, жан-жақты және объективті зерттеу, сондай-ақ қорғау тарапы мәлімдеген дәлелдерді тексеру мақсатында мемлекеттік айыптау келесі құжаттарды қылмыстық іс материалдарына қосуды және сот отырысында зерттеуді сұрайды", - деді Әбуов.

Құжаттар арасында үйді басқару органдарының бұрынғы төрағаларына қатысты материалдарды бөліп шығару және Қылмыстық кодекстің 254-бабында ("Міндеттеріне адал қарамау" - еск.) көзделген қылмыстық құқық бұзушылық белгілері бойынша жеке қылмыстық іс қозғау туралы рапорт бар.

"Аталған құжаттың осы іс үшін маңызы бар, себебі ол бұрынғы басшылардың міндеттерін атқаруына қатысты жағдайлардың құқықтық бағалаусыз қалмағанын, керісінше, қатысы бар барлық тұлғаға тиісті баға берілетін бөлек қылмыстық іс жүргізу нысанасы екенін растайды", - деді прокурор.

Рапорт 2026 жылғы 6 тамызда жасалған. Онда істі тергеу барысында өзге тұлғалардың әрекетінен қылмыстық құқық бұзушылық белгілері анықталғаны айтылған.
Тағы бір құжат үйді салған мердігерге қатысты. Прокуратура оған қатысты қылмыстық істі тоқтату туралы бекітілген қаулыны іске қосуды сұрады.
Әбуовтың айтуынша, бұл құжат қорғау тарапының "қайғылы оқиғаға үйді салу кезінде жіберілген заңбұзушылықтар себеп болуы мүмкін және салдары үшін жауапкершілік құрылыс салушыға жүктелуі тиіс" деген уәждеріне байланысты маңызды. Прокурор сапасыз құрылысқа қатысты істі тоқтатудың үш себебін атады.
Атап айтқанда, тиісті әрекет үшін қылмыстық жауапкершілік 2015 жылдың 1 қаңтарынан бастап енгізілген, ал үй 2003–2004 жылдары салынып, 2005 жылы пайдалануға берілген. Сонымен қатар заңнамада белгіленген кепілдік мерзімдері өтіп кеткен, ал құрылыс салынған сәттен бастап 20 жылдан астам уақыт өткен. Құрылысқа тікелей қатысы бар және іс материалдарында көрсетілген тұлғалар қайтыс болған.
Судья Меруерт Абаева прокурордан: мәселе істі тоқтату туралы қаулы жайында болып отыр ма деп нақтылады. Прокурор мұны растады. Ол сотқа дейінгі тергеуді тоқтату туралы қаулы 2026 жылғы 21 шілдеде шығарылып, Астана прокуратурасы бекіткенін хабарлады.
Сот мемлекеттік айыптаудың өтінішін қанағаттандырып, құжаттарды іс материалдарына қосты.
Бұған дейін Ұлдана Мырзуанның өліміне қатысты сот тікелей эфирде өтетіні хабарланған болатын. Трансляцияны Tengrinews.kz сайтының YouTube-арнасынан көруге болады.

Өткен отырыстарда не болды?
18 тамызда Астананың қылмыстық істер жөніндегі ауданаралық сотында басталды фельдшер Ұлдана Мырзуанның өліміне қатысты іс бойынша алдын ала тыңдау басталды. Істі судья Меруерт Абаева жүргізіп жатыр.
Процеске екі мемлекеттік айыптаушы - Нұрдәулет Әбуов пен Саяжан Серікова, қаза тапқан фельдшер Ұлдана Мырзуанның анасы Салима Омарова және күйеуі Әділет Зейнел қатысып жатыр.
Бұған дейін оның адвокаты Мұрат Мәуметов Әділет Зейнел Ұлдананың анасының пайдасына жәбірленуші мәртебесінен бас тартатынын айтқан еді. Алайда кейін сот бұл өтінішті қанағаттандырудан бас тартты. Зейнелдің өзі журналистердің сұрағына жауап беруден бас тартты. Кейін ол жәбірленуші мәртебесінен не себепті бас тартқанын сотта айтып берді.
Айыпталушы орындығында қайғылы оқиға болған үйдің МИБ төрағасы Сәуле Жұбаниязова отыр. Өткен сот отырысында ол өзін кінәсіз деп санайтынын мәлімдеді.
Ұлдананың анасының адвокаты Нұрсұлтан Орынбековтің айтуынша, бұл іс Қылмыстық кодекстің 254-бабы ("Міндеттеріне адал қарамау") бойынша қаралып жатыр.
20 тамызда сотталушының адвокаты судья Меруерт Абаеваға қарсылық білдірді, алайда бұл өтініш қабылданбай, процесс жалғасты.
Фельдшер Ұлдана Мырзуанның күйеуі Әділет Зейнел сотта жауап берді. Ер адам жұбайы қайғылы жағдайға ұшыраған күн туралы баяндады. Сондай-ақ ол сотқа жұбайының қазасы туралы қалай білгенін және әкімдікте алған 20 миллион теңге туралы хабарлады.
Сондай-ақ оның анасы жауап берді. Әйелдің айтуынша, өз қызын танымай қалғанын ауруханаға барған кезде белгілі болған. Сонымен қатар жәбірленуші құдағиының әкімдіктен берілген көмек қаржының 4,5 миллион теңгесін қайтаруды талап еткенін жеткізді.
26 тамызда сотта жәбірленушілер мен куәгерлер жауап берді. Атап айтқанда, жәбірленуші Гүлнәр Қалиева 2025 жылғы 8 қарашада әпкесімен бірге үй маңындағы дүкенге бара жатқанын айтты. Олар ғимаратқа жақындай бергенде, үйдің қаптамасы жоғарыдан құлап түскен. Әйел тек басын қолымен жауып үлгерген. Оның айтуынша, "кірпіштер жаңбырша жауған".
Сондай-ақ Ұлдананың әріптесі Дильназ Байзақова сотта жауап берді. Қайғылы оқиға болған күнді еске алған кезде, ол көз жасына ерік берді.
2 қыркүйекте сот куәгерлердің - үй тұрғындарының жауаптарын тыңдады. Атап айтқанда, куәгер Валерия Самсонова үйдің қабырғаларында жарықтар пайда болғанын айтты. Мұны куәгер Халил Бабалиев те растады. Оның айтуынша, "үйдің іргесі сөгіліп жатыр".
Сондай-ақ сотта қаптама құлаған сәт түсірілген видео көрсетілді.
3 қыркүйекте сотта қылмыстық іс материалдарын зерттеу жалғасты. Мемлекеттік айыптаушы Нұрдәулет Әбуов ғимарат қасбетінің құлау себебі көрсетілген техникалық сараптама қорытындысын жариялады.
“Бүкіл үй құлап жатыр деп ойладым“ - Ұлдана Мырзуанның өліміне қатысты іс бойынша куәгер
9 қыркүйекте сот құрылыс саласындағы маман Вероника Лобаеваны тыңдады. Ол үй жобасындағы сәйкессіздіктерді "мина іспетті" деп атады.
Сондай-ақ сотта сотталушы Сәуле Жұбаниязова жауап берді. Ол қайғылы оқиғаға өзін кінәлі деп санамайтынын сотқа тағы айтты. МИБ төрағасының сөзінше, ол міндеттерін атқаруға кіріскен кезде, тұрғындар да, бұған дейінгі басқарушы да үйге қатысты қандай да бір мәселелерге шағымданбаған.
Бүгін, 10 қыркүйекте, сот техникалық қадағалау маманы Денис Воробьёвты тыңдады. Оның айтуынша, ғимарат қасбетінде ақау белгілері қаптама құлағанға дейін пайда болған. Алайда олардың қаншалықты қауіпті екенін ешкім түсінбеген.
Қайғылы оқиға қалай болды?
2025 жылғы 8 қарашада Астанада Тәуелсіздік даңғылы, 24 Б мекенжайындағы тоғыз қабатты үйдің қасбетінен кірпіш қаптама құлаған. Салдарынан бес адам зардап шекті. Олар №1 көпбейінді ауруханаға жатқызылды.
Бір пациенттің жағдайы өте ауыр болды, оған ота жасалды. Тағы екі адам жансақтау бөлімінде жатты, дәрігерлер олардың жағдайын ауыр деп бағалады. Қалған екі адам бөлімшеге орналастырылды, олардың жағдайы тұрақты деп бағаланды.
Ең ауыр жарақат алған пациент - оқиға орнына жеткен жедел жәрдем фельдшері, 23 жастағы Ұлдана Мырзуан болып шықты. Қыздың туыстарының айтуынша, ол зардап шеккендерге алғашқы болып көмекке ұмтылған. Олардың арасында бала, оның анасы және туысы болған. Ұлдана зардап шеккендерге қарай жүгірген кезде, "үстіне кірпіш пен кондиционердің бекіткіші құлаған". 18 қарашада ол ауруханада көз жұмды.
Оқиғадан кейін полиция Қылмыстық кодекстің 278-бабы "Сапасыз салынған құрылыс" бойынша қылмыстық іс қозғады. Кейін істе тағы бір бап пайда болды – 306-бап "Қауiпсiздiк талаптарына сай келмейтін тауарларды шығару немесе сату, жұмыстарды орындау не қызметтер көрсету".

Президент Қасым-Жомарт Тоқаев Ұлдана Мырзуанды ерлігі, жанқиярлығы және міндетін үлгілі атқарғаны үшін "Ерлігі үшін" медалімен марапаттады. Қазақстандықтар жедел жәрдем фельдшерімен қалай қоштасқаны туралы мына материалда.