Трамп менен Назарбаев Ак үйдө жолугууда

Жолугушуу башталган кезде, кабарчылар алдында кыска сүйлөгөн учурунда Нурсултан Назарбаев Дональд Трампты кызматка киришкенинин бир жылдыгы менен куттуктап, “Казакстан АКШнын биздин көз карандысыздыгыбызды, аймактык бүтүндүгүбүздү колдогонун жогору баалайт”, - деп белгиледи.


Ак үйдүн мурдараак билдиргенине караганда, АКШ жана Казакстандын президенттери 16-январдагы сүйлөшүүлөрүндө аймактык коопсуздук, эки тараптуу карым-катыш жана экономикалык маселелерге көңүл бурары күтүлгөн.


Нурсултан Назарбаев Борбор Азия чөлкөмүнөн АКШнын азыркы президенти менен эки тараптуу расмий сүйлөшүү өткөрүп жаткан алгачкы президент болду.


Ак үй эки президент “бир катар эл аралык проблемаларды, анын ичинде Ооганстанды” да талкуулай турганын маалымдаган.


Бул маселенин Казакстандын БУУнун Коопсуздук кеңешиндеги учурдагы төрагалыгына да таасири бар.


Казакстандын мамлекеттик “Казинформ” агенттиги болсо Назарбаев Трампка жолукканда Орусия менен мамилени, Сириядагы согушту, соода маселелерин да талкуулай турганын кабарлаган.


- Президент акыркы 10 жылда АКШда бир нече жолу болгон, бирок алар расмий эмес иш сапарлар болчу. Бул иш сапары эки тараптуу байланышты кеңейтүү, соода-экономикалык, инвестициялык жана инновациялык-технологиялык өнөктүктү тереңдетүү жагынан маанилүү саясий белги деп таанылды, – деп билдирген Казакстандын Тышкы иштер министрлигинин өкүлү Талгат Жумагулов.


Назарбаев АКШдагы бул жолку сапары учурунда, 18-январда БУУнун Коопсуздук кеңешинде өзөктүк куралды жайылтпоо маселесине арналган жыйынга да катышат. (UE)