Камактагы төрт оппозициячынын соту 31-январга белгиленди

Бишкек шаардык соту 24-январда бийликти күч менен басып алууга аракеттенген деп айыпталган Бектур Асанов, Эрнест Карыбеков, Кубанычбек Кадыров жана Дастан Сарыгуловдун ишин жабык карады.  Саясий туткундарды коргоо комитетинин мүчөсү, жарандык активист Зулфия Мараттын "Азаттык" радиосуна билдиришинче, судья Адис Момуналиев айыпталып жаткандардын УКМКнын тергөө тобунун жетекчиси Максат Эсенбаевди териштирүүгө чакыруу тууралуу өтүнүчүн канааттандырган жок.


Анын айтымында, сот адвокаттар менен айыпталуучулардын каршылыктарына көңүл бурбай жатат. Адвокаттардын каршылыгына карабай күбөлөрдү суроону токтотуп койду. Ошондой эле Асанов менен Кадыровдун үстүнөн арыз жазган адамды чакырып, суракка алуу тууралуу өтүнүчтү четке какты.  


Маалыматка караганда, камактагы оппозициячылардын кийинки соту 31-январга белгиленди. Февралдын башында шаардык сот алардын аппеляциялык доо арызы боюнча акыркы чечим кабыл алат. 


Биринчи Май райондук соту былтыр 17-апрелде Эрнест Карыбековду 20,  Кубанычбек Кадыров менен Бектур Асановду 12 жылдан, Дастан Сарыгуловду төрт жылга шарттуу кескен.  2016-жылдын жазынан бери камакта отурган айыпталуучулар райондук соттун чечимине макул болбой жогорку инстанцияга даттанышкан. Соттолуучулар өздөрү жана айрым жарандык активисттер алар саясий негизде камакка алынганын белгилеп келишет.  (NT)