Bloomberg: Путиндин кызы күйөөсү менен ажырашты
Аталган агенттик жыйнаган маалыматка караганда, жубайлардын ажырашуусуна Шамаловдун нефтехимиялык «Сибур» компаниясындагы үлүшүн сатуусунун да байланышы бар.
Bloomberg агенттигине маалымат берген булактардын үчөө Шамалов акцияларды сатуудан эч киреше таппаганын, «Сибур» компаниясынын активи ага «Путиндин үй-бүлөсүнүн мүчөсүнө ишеним» катары гана берилгенин белгилеген. Бирок агенттиктин маектештеринин төртүнчүсү акциялардын сатылуусу менен ажырашуунун ортосунда эч байланыш жоктугун айткан.
Кирилл Шамалов - «Россия» банкына ээлик кылгандардын бири, президент Путиндин досу делип жүргөн Николай Шамаловдун уулу. Шамалов менен Тихонованын үйлөнгөнү же ажырашканы тууралуу буга чейин расмий айтылган эмес. Кремл президенттин үй-бүлөсү тууралуу маалыматтарды өтө жашыруун кармайт.
Путин өзү да Катерина Тихонова анын кызы деген маалыматтарды ырастаган да, төгүндөгөн да эмес. (UE)