Трамп Кабулдагы жардыруудан кийин “катуу чараларды” көрүүнү талап кылды
“Мен Кабулдагы бейкүнөө ондогон адамдардын өмүрүн алган, жүздөгөн кишини жарадар кылып, карасанатайлык менен жасалган чабуулду айыптайм. Бул теракт мындан ары биздин ооган өнөктөштөрүбүз менен иштөө нугун өзгөртөт. Эми бардык өлкөлөр талиптерге жана террористтик уюмдарды колдогон тараптарга каршы чечкиндүү кадамдарды жасашы керек, - деди Трамп 27-январдагы билдирүүсүндө.
27-январда Кабулдун эл жыш жайгашкан районунда жанкечтинин жарылуусунан каза тапкандардын саны 95ке, жарадарлардын саны 158ге жетти. Өкмөттүк медиа борбордун директору Баряли Хилали ооруканага жеткирилген жарадарлардын акыбалы оор болгондуктан курмандыктар дагы көбөйүшү мүмкүн экенин билдирди.
Жардыруу үчүн жоопкерчиликти “Талибан” кыймылы өзүнө алган. Жанкечти Тез жардам унаасы менен бир нече көзөмөл пункттардан өтүп барып жарылган.
Бул калаба өткөн жумада "Интерконтиненталь" мейманканасында кеминде 25 кишинин өмүрүн алган кол салуудан кийинки ири теракт болуп калды.
27-январь күнү Гилменд провинциясында да жанкечти автоунааны жардырып жибергенде алты адам жарадар болгон.(КЕ)