Түндүк Корея Олимпиада алдында аскердик парад өткөрдү
Түндүк Корея Пхёнчхандагы кышкы Олимп оюндарынын расмий ачылышына бир күн калганда аскердик парад өткөрдү.
Түштүк Кореянын өкмөтүндөгү атын атагысы келбеген аткаминердин айтымында, Ким Ир Сен аянтында өткөн парадга он миңдеген кишилер катышкан. Ал жерде Түндүк Корея лидери Ким Чен Ын эмне деп сүйлөгөнү, кандай куралдар көрсөтүлгөнү азырынча белгисиз.
Адатта Түндүк Корея армиясынын негизделген күнүнө карата иш-чаралар апрелде өткөрүлүп келген. Былтыркысына Пхеньян чет өлкөлүк журналисттерди да чакырып, баллистикалык ракеталарын көрсөткөн.
Түндүк Корея баллистикалык ракеталарын байма-бай сынап коңшуларын жана АКШны опузалап келет. Январдан тарта Түштүк Корея менен сүйлөшүүгө даярдыгын билдирип, Олимпиадага катышууда.