Навальный сайтына бөгөт коюлганын билдирди
Мурдараак Орусиянын көзөмөл комитети (Роскомнадзор) иликтөө материалдарын таратууга тыюу салган сот чечими бар экенин билдирип, жергиликтүү маалымат каражаттарына аны жарыя кылбоону эскерткен. Ал эми Навальныйдан материалдарды алып салууну талап кылган. Саясатчы буга каршы Роскомнадзорду сотко берген.
Навальный 8-февралда кезектеги иликтөөсүн жарыялап, Дерипаска вице-премьер Приходькону яхтасында сыйлаганын, ал жерде интим кызмат көрсөткөн кыздар да болгонун билдирип чыккан. Муну оппозициячы коррупция жана моралдык бузулуу катары баалаган.
Анын эртеси, 9-февралда эле Дерипасканын арызы кабыл алынып, ошол эле күнү сот Навальныйдын сайтындагы иликтөөнү эл көрбөй тургандай чектөөнү Роскомнадзорго тапшырган.