Ат-Башыда жаштар токсикоманияга каршы жөө жүрүш уюштурду
“Биз токсикоманияга каршыбыз” деген чакырык менен өткөн акцияны “Ат-Башы ынтымагы транс” коомдук уюму уюштурду. Анын жетекчиси Ринат Кусеинов:
- Алыс жакта жумалап жумушта жүргөндө балдарыбыз көзөмөлсүз калгандыктан желим жыттап же насвай, тамеки таптып жаткандыктан ушундай иш-чараны уюштурууга аргасыз болдук, - дейт.
Ат-Башы райондук билим берүү бөлүмүнүн жетекчиси Дүйшөнкул Дөөткулов жаштарда мындай адат көбөйүүдө деп эл ичинде айтылганы менен расмий түрдө бир дагы факт катталбаганын билдирди.
Өткөн жылы "Кыргыз Республикасындагы Чыгыш-Батыш СПИД фонду" өлкө боюнча 57 мектепте окуучулар арасында сурамжылоо жүргүзгөн. Анын жыйынтыгында өлкөдөгү 15-16 жаштагы окуучулардын басымдуу бөлүгү кара куурай тобундагы маңзаттарды жана башка психотроптук каражаттарды колдоно турганы аныкталган. Окуучулар арасында мындай иликтөө өлкөдө биринчи жолу жүргүзүлгөндүктөн адистер тыюу салынган маңзат колдонгон өспүрүмдөр көбөйгөнүн же азайганын билүү кыйынга турарын белгилеп келишет. (MiK)