Атаева: Өмүрбек Текебаевдин ишин эл аралык уюмдар карайт
Атаева Кыргызстан жарандык жана саясий укуктар боюнча эл аралык пакты ратификациялаганын, ага таянып БУУнун Адам укуктары комитети жеке арыз боюнча өз сунушун бере алаарын кошумчалады.
"Текебаев азырынча өзүн коргоонун бардык мүмкүнчүлүктөрүн колдоно элек. Алдыда чоң иш турат. Эми эл аралык коргоонун алкагына өтүүдө",-деди Атаева.
26-февралда Жогорку Кеңештеги "Ата Мекен" фракциясынын мурдагы лидери Өмүрбек Текебаевдин камалганына туура бир жыл болду.
Текебаев жана анын партиялашы Дүйшөнкул Чотонов былтыр "орус ишкеринен бир миллион доллар пара алды" деген айып менен ар бири сегиз жылдан абакка кесилишкен. Текебаев муну саясий куугунтук деп баалап, экс-президент Алмазбек Атамбаевди күнөөлөгөн. Атамбаев болсо бул иште саясат жоктугун бир канча ирет билдирген.