Кыргызстан-Индия: кыргыз футболчулары 2:1 эсебинде утту
Кечки саат сегизде башталган беттештин алгачкы мүнөттөрүндө (1 мүнөт 47 секунд) кыргызстандык чабуулчу Антон Землянухин Индиянын дарбазасына гол киргизип, эсепти ачты.
Ал эми экинчи топту оюндун 70-мүнөттөрүндө Мирлан Мурзаев киргизди.
Андан кийин Индиянын курама командасы бир гол киргизгенге жетишти.
Беттешти КТРК-Спорт каналы түз көрсөтүп жатат. Азырынча эсеп 2:0.
Бул оюн - 2019-жылы Бириккен Араб Эмирлигинде өтө турган футбол боюнча Азия кубогуна тандоо оюндарынын 3-айлампасынын акыркы беттештеринин бири.
Билеттер 22-марттан баштап 250-500 сомдон сатылды.
Эки команда былтыр 13-июнда Индияда беттешип, Кыргызстан 1:0 эсебинде утулган. Кыргызстандын курама командасы 22-мартта Мьянманын футболчуларын 5:1 эсебинде утуп, Азия чемпионатына алгач ирет жолдомо алган.
Азия кубогунун 3-айлампасындагы тандоо оюндарында Кыргызстан “А” тобунда Индия, Мьянма жана Макао менен ойноп жатат.
Беш оюндан кийин Индиянын командасы 12 упай топтоп 1-орунда келүүдө. Кыргызстанда 10, Мьянмада 5 упай бар. Макаодо упай жок. Бүгүн Мьянма да өз жеринде Макао командасын кабыл алат.
Тайпада алдыңкы эки орунду ээлеген командалар финалга жолдомо алышат. 2019-жылдагы Азия кубогунун финалдык бөлүгү 5-январдан 1-февралга чейин Бириккен Араб Эмирлигинин төрт шаарында өтөт. Ага 24 команда катышат.