Кабулда ИИМ имаратына чабуулдун мизи кайтарылды
ИИМдин өкүлү Дауд Аминдин айтымында, коопсуздук күчтөрү жалпысынан үч жанкечтини, дагы жети согушкерди жок кылды. Ал эми полиция тараптан бирөө мерт болуп, башка беш киши жарадар болгон. Кабулдагы бул чабуул үчүн азырынча эч ким жоопкерчилик ала элек. Мунун алдында бүгүн Логар провинциясында жанкечтилердин тобу полиция бекетине кол салган эле.
"Талибандын" өкүлү Забихулла Мужахиддин, Логар провинциясынын борбору Пол-и-Алам шаарындагы чабуул үчүн алар жоопкер экенин ырастады.
Жанкечтилердин жардыруусунан үч полиция кызматкеринин өмүрү кыйылгандан тышкары дагы 12 киши, анын ичинде сегиз жайкын тургун жаракат алган.
Ооган полициясынын маалыматына караганда, адегенде жанкечтилердин бири жардыруучу затка шыкалган унааны полиция кеңсесине жакын жерде жардырган. Ал эми үч жанкечти ал жакка кирүүгө аракеттенгенде коопсуздук күчтөрү аларды атып өлтүрдү. Жардыруудан айланадагы турак үйлөрдүн бир нечеси да талкаланган.
"Талибан" быйыл апрелде жазгы чабуулу башталганын жарыялагандан бери ооган коопсуздук күчтөрүнө жана өкмөт өкүлдөрүнө каршы кол салууларын күчөттү. Кол салууларды “Ислам мамлекети” террордук тобу дагы жасоодо. (UE)