Путин ШКУ саммитинин алдында Кытайга барды
Кытайдын бийлиги билдиргендей, Ирандын президенти Хасан Роухани да Бээжинге 8-июнда барат. Саммит ишемби-жекшемби күндөрү Циндао порттук шаарында өтмөкчү.
Шанхай Кызматташтык Уюму (ШКУ) 2000-жылдардын башында Кытай, Орусия, Казакстан, Кыргызстан, Тажикстан жана Өзбекстан тарабынан түзүлгөн. 2007-жылы аларга Индия жана Пакистан кошулган, Иран болсо уюмга кирүү ниетин билдирип келет.
Талдоочулар жолугушууда Путин, Си Цзинпин жана Роухани АКШ Ирандын өзөктүк программасы боюнча эл аралык келишимден чыгарын жарыялагандан кийинки жагдайды өзүнчө талкуулашы мүмкүн экенин айтышууда. Бирок бул маселе саммиттин күн тартибине кирген эмес.
Кытай - Ирандын ири соода өнөктөшү жана мунайын алган негизги кардарлардын бири. Бээжин өкүлдөрү буга чейин белгилешкендей, Вашингтон Тегеранга каршы санкцияларды жандандырууну эскерткенине карабай, Иран менен соода пландары токтотулбайт.
Кытайдын бийлиги ошондой эле бийик деңгээлдеги жыйында Бээжиндин “Бир кур бир жол” долбоорун алга сүрөөгө мүмкүнчүлүк берет дешет.