Ысык-Көлдөгү ипподромдун курулушу боюнча кылмыш иши козголду
Маалыматта айтылгандай, Көчмөндөр оюндарын өткөрүш үчүн сөз болуп жаткан мекемелердин курулушуна Финансы министрлигинен 1 млрд. 584 млн. сом которулган. Эсеп палатасынын текшерүүлөрү мамлекетке 202 млн. 814 миң сом зыян келтирилгенин аныктады. Тергөө иштерин улантуу УКМКнын тиешелүү кызматына тапшырылды.
2014-жылы сентябрда болгон алгачкы Көчмөндөр оюндарын утурлай Чолпон-Атадагы ат майданды куруу иштери ошол жылы июль айында шашылыш башталган. "Убакыт аз" деген негиз менен оңдоп-түзөө иштери долбоорлоо документтерин даярдабай туруп жүргүзүлгөн.
Натыйжада ипподром быйыл сентябрда Ысык-Көлдө өтө турган Дүйнөлүк көчмөндөр оюндарына даярдык көрүш үчүн оңдолмой болгон. Ат майданды оӊдош үчүн бюджеттен 10 миллион сом бөлүнөт. (КЕ)