Арменияда экс-президенттин инилери коррупция боюнча айыпталууда
Армениянын мурдагы президенти Серж Саргсяндын иниси Александр Саргсян камактан чыкты. Бул тууралуу "Азаттыктын" армян кызматына полициянын коомчулук менен байланыш башкармалыгынын жетекчиси Ашот Агаронян билдирди. Ал ошондой эле экс-президенттин бир тууганынан табылган куралдын мыйзамдуулугу текшерилип жатканын кошумчалады.
25-июнда Ереванда Александр Саргсян кармалып, полиция бөлүмүнө жеткирилген. Ага "мыйзамсыз курал алып жүрөт" деген кине коюлган.
Ага удаа эле экс-президенттин дагы бир иниси Левон Саргсян жетектеген "Пюник" аттуу кайрымдуулук фондунун кеңсесинде тинтүү жүргүзүлгөн. Коопсуздук комитети Саргсяндын фонду 40% ээлик кылган «Жи Эл Жи проект» компаниясы дайыма салыкты жашырып жүргөнү аныкталганын билдирди.
Дүйшөмбүдө Армениянын Коопсуздук кызматы экс-президент Саргсяндын күзөт кызматынын мурдагы башчысы Вачаган Казарянды кармады. Ага тиешеси бар деп эсептелип жүргөн Еревандагы музыкалык клубда тинтүү жүргүзүлгөндө чоң суммадагы акча – 1,1 миллион доллар, 230 миңден ашуун евро жана 36 миллиондой драм табылган. Мынча акча кайдан келгени ушул тапта иликтенип жатат.