Трамп: НАТО өлкөлөрү коргонууга бөлүнчү каражатты көбөйтөт
"Ички дүң өнүмдүн 2% бөлүүгө макулдашкандан кийин биз дагы көбөйтүшүбүз керек. Бир нече жылга кетип, 4% чейин жеткирүүбүз зарыл" - деди америкалык лидер. Буга чейин коргонуу чыгымдарын 2025-жылга карай аны акырындык менен көбөйтүү белгиленген.
Трамп ошондой эле АКШ өзүнө алган милдеттенмелерин аткара турганын бышыктады. Бүгүн америкалык лидердин катуу сынынан кийин лидерлер чукул жыйынга чогулушту.
Стокгольмдогу Дүйнөдөгү тынчтыкты изилдөө институтунун маалыматына караганда, АКШ ички дүң өнүмүнүн 3% ашуун бөлүгүн коргонууга жумшайт.
Дүйнөдө коргонуу тармагына ички дүң өнүмүнөн 4% ашуун каражат бөлгөн өлкөлөр саналуу эле. Алар: Сауд Арабиясы, Израил жана Орусия. 2017-жылдагы маалымат боюнча Орусия бул тармакка 4,3% бөлгөн.