НАСА Күнгө аппарат учурду
НАСА 12-августта "Паркер" аттуу аппаратын Күнгө учурду. Ал эң ысык планетаны курчап турган атмосферанын сырткы катмарына жетиши керек деп пландалган.
Бул тарыхтагы биринчи жолу Күнгө учуу.
Аппарат мерчемделген аралыкка 88 күндө жетип барышы керек. 1300 градус Цельсий температурага барабар мейкиндикте иштеп, маалымат чогултары күтүлүүдө. Чоңдугу орточо автоунаага барабар зонд көп катмарлуу карбон материалы менен калкаланган. Бир эле бурчуна калканч жетпей калса дароо иштен чыгып, күйүп жок болушу ыктымал.
Окумуштуулар Күн шамалынан пайда болгон түндүк уюлдагы жаркырактар, магниттик талааларды жана башка кубулуштарды тереңирээк изилдеп, натыйжада "Күн ырайын" алдын ала айта турган мүмкүнчүлүктү табууну максат кылып жатышат.
Америкалык астроном Юджин Паркер өткөн кылымдын орто ченинде Күндөгү жарылуулардан тараган толкундун шарпасы - Күн шамалы миллиарддаган чакырымга тарай турганын ачкан. Зонд мына ошол окумуштуунун атынан коюлган. Долбоорду ишке ашырууга америкалык космос агенттиги 1,5 млрд. доллар жумшады.