Скрипалдарды ууландыруу ишин БУУнун Коопсуздук кеңеши карайт
Лондондун талабы боюнча 6-сентябрда Бириккен Улуттар Уюмунун Коопсуздук кеңеши орусиялык мурдагы тыңчы Сергей Скрипал менен анын кызы Юлиянын ууланышындагы жаңы жагдайларга байланыштуу жыйынга чогулат.
Улуу Британия бул иш боюнча БУУнун Коопсуздук кеңешин чукул жыйынга чогулууга 5-сентябрда чакырган. Анын алдында Лондон Солсберидеги ууланууну уюштурду делген эки орусиялыктын атын атап, сүрөтүн жарыялаган. Британ премьер-министри Тереза Мэй парламентте алар Орусиянын чалгын кызматкерлери болушкан деп билдирген. Москва болсо жаңы маалыматтар эч нерсени билдирбейт деп четке кагууда.
Орусиялык мурдагы чалгын кызматкери Сергей Скрипал жана анын кызы Юлия быйыл 4-мартта Британиянын Солсбери шаарында "Новичок" деген нервди шал кылуучу зат менен ууланганы айтылган. Алар ооруканада жатып, дарыланып чыгышкан. Скрипалдардан тышкары июнь айында Эймсбери шаарында дагы эки британ жараны ууланып, бири каза болгон.
“Химиялык куралга тыюу салу уюмунун” (ОЗХО) эксперттери экөөндө тең аларды “Новичок” буттан чалганын 4-сентябрда ырасташты.