Абакта ачкачылык кармаган Сенцов керээз катын жазды
Сенцов бөлөсү Наталья Капланга абактан жазган катында “абалым жаман, эми аба жетпей гипоксия болуп жатам, башым тегеренип, бүт денем, буту-колум сенек болуп жатат” - деп кабарлаган.
Режиссер “бул окуянын оң аяктаарына көзүм жетпей турат, бирок мен багынбайм” – деп керээзин жазган.
Буга чейин адвокат Дмитрий Динзе ачкачылыктан Сенцовдун жүрөк-кан тамыр системасы, бөйрөк, боору жабыркаганын, керебеттен араң туруп жатканын айткан. Адвокаттын кабарлашынча, терапия жүргүзгөн колониянын кызматкерлери аны күнүгө ачкачылыктан баш тартууга көндүрүү аракетин көрүшүүдө.
Сенцов отурган түрмө жайгашкан Ямал-Ненецк автономдуу округунун акыйкатчысы Анатолий Сак 6-сентябрда режиссердун абалы менен таанышып чыккан. “116 күн ачка отурган адам үчүн жакшы эле көрүнөт. Дары сайып жардам берүүгө өзү макулдугун берген” – деп айткан Сак.
2015-жылы Орусиянын соту Сенцовго аннексияланган Крым жарым аралында теракт даярдаган деген айып тагып, 20 жылга кескен. Күнөөсү жоктугун айтып келаткан режиссер 14-майда Орусиянын түрмөлөрүндө отурган бардык украиналык саясий туткундарды бошотуу талабы менен ачкачылык жарыялаган.
Акыркы айларда Сенцовду бошотуу талабы менен 100дөн көп маданият ишмерлери, укук коргоочулар жана Батыш лидерлери чыгышкан.
25-июнда Европа кеңешинин баш катчысы Турбьөрн Ягланд президент Владимир Путинди Сенцовдун айыбын кечирүүгө үндөгөн.
Бирок Сенцов Путинге ырайым сурап кайрылуудан баш тарткан.
Сенцов 14-майдан бери Ямал-Ненецк округундагы Лабытнанги шаарынын "Ак аюу" деген түрмөсүндө ачкачылык кармап отурат.