Орусия Сирия армиясына С-300 зениттик ракеталык комплекстерин берет
Орусия эки жума ичинде Башар Асаддын армиясына С-300 зениттик ракеталык комплекстерин берет. Бул тууралуу Орусиянын коргоо министри Сергей Шойгу 24-сентябрда билдирди. Мындай чечим Кремл бир жума мурда Сирияда орусиялык Ил-20 учагынын кыйроосуна Израилди айыптаган окуядан кийин кабыл алынган.
- Сириянын куралдуу күчтөрүнө эки жума ичинде заманбап С-300 зениттик ракеталык комплекстери берилет. Ал асмандагы 250 километр чакырымдагы кол салууну тосуп калууга жөндөмдүү жана бир учурда бир канча багытты бутага алат. Жогорку коргонуусу жана тез ата алганы менен ракеталык комплекс Сириянын абадан коргонуу кубатын кыйла күчтөнтөт.
Орусиянын Коргоо министрлиги 18-сентябрда Сириянын аба мейкиндигинде ИЛ-20 аскерий учагынын атып түшүрүлгөнүнө байланыштуу Израилди “акылсыз аракеттерге” барды деп айыптаган.
Москванын маалыматына караганда, ал күнү Израилдин төрт истребители Сириянын Латакия шаарындагы жайларга Жер Ортолук деңизи жактан сокку урган. Буга жооп кылып Сирия арсмиясы аткан сокку орусиялык учакка тийген. Москва израилдик истребителдер орус учагына жашынган деп эсептейт.
Израил "кырсыкка тиешеси бар" деген айыптоолорду четке каккан. Ал Ил-20 чалгын учагынын атып түшүрүлгөнү үчүн Сирия президенти Башар Асаддын куралдуу күчтөрү, Иран жана "Хезболла" экстремисттик уюму жооптуу деп билдирген.