Помпео Пхеньянга сапарын оң баалады
АКШнын мамлекеттик катчысы Майк Помпео 7-октябрда Түндүк Кореянын лидери менен жолукту.
“Пхеньянга сапарым жакшы болду. Төрага Ким менен жолуктум. Биз Сингапур саммитиндеги макулдашуулар боюнча алдыга жылууну улантабыз” деп жазды Помпео “Твиттердеги” барагына.
Ал эми сүйлөшүүдөн кийин Ким Чен Ын “Бул эки өлкө үчүн дурус келечекти убада кылган мыкты күн” деп белгиледи.
Ушул эле күнү Помпео Сеулда Түштүк Кореянын президенти менен жолукту.
Түштүк Корея президентинин администрациясы Пхеньянда АКШ жана Түндүк Корея лидерлеринин экинчи саммитин “мүмкүн болушунча тез арада” өткөрүү жагы талкууланганын билдирди.
Ким Чен Ын менен Дональд Трамп алгач ирет быйыл июнда Сингапурда жолуккан. Анда Түндүк Кореяны өзөктүк куралдан арылтуу маселеси көңүл чордонунда турган. Бул өлкө дүйнөгө бүлүк салчу куралынан толук баш тартса, эл аралык санкциялар алынарын Вашингтон убада кылууда.