Ооганстанда жанкечтинин жардыруусунан сегиз адам өлдү
Провинция губернаторунун басма сөз катчысы Умар Шахтинин “Эркин Европа/Азаттык” радиосунун ооган кызматына айтканына караганда, жанкечтинин жардыруусунан сегиз кишинин өмүрү кыйылгандан тышкары, 11 киши жарадар болду. Жабыркагандардын арасында парламент депутаттыгына талапкер Салих Мухаммед Хан Ачакзай да бар.
Жардыруу үчүн азырынча эч кайсы топ жоопкерчилик ала элек.
Бирок Ооганстандын көптөн бери күтүлгөн парламенттик шайлоосун утурлай “Талибан” менен катар “Ислам мамлекети” экстремисттик тобу да өлкөнүн ар кайсы аймактарында чабуулдарын күчөттү.
Өткөн аптада Нангархар провинциясында жанкечтинин шайлоо митингиндеги жардыруусунан 18 киши мерт болгон. Анда жардыруу үчүн “Ислам мамлекети” тобу жоопкерчилик алган.
Ал эми “Талибан” кыймылы 8-октябрдагы билдирүүсүндө шайлоого тоскоолдук кылыш үчүн колдон келгендин баарын кылууга, шайлоого жардам бергендердин баарын бутага алууга убада берген. “Талибан” 20-октябрдагы шайлоону “чет элдик оккупацияны актоо боюнча америкалык кутум” деп атаган.
Улуттар Уюмунун Ооганстандагы миссиясы болсо оогандарды тескерисинче шайлоо жараянына жигердүү аралашууга чакырган. Акыркы эки айда парламентке талапкерлиги коюлган кишшилердин кеминде сегизи мерт болду. (UE)