УКМК: Баткенде жерге көмүлгөн автомашина табылды
Улуттук коопсуздук боюнча мамлекеттик комитет аны 2015-жылы Сирия жана Ирактагы согушкерлерди каржылоо үчүн акчалуу адамдарды карактап жүргөн террордук уюмдун мүчөлөрү көмүп салышканын айтууда.
“Автомашина 2015-жылдын апрель айында карактоо учурунда колдонулган. Ош шаарынын тургунуна кол салып, анын 1 миллион 300 миң долларын тартып алган окуяга байланыштуу кылмыш иши козголуп, бирок кайра жабылган. Учурда ошол ишке катыштыгы барларды аныктоо максатында УКМК жана ИИМ өкүлдөрүнөн турган атайын топ түзүлдү” деп билдирди бүгүн коопсуздук комитетинин басма сөз кызматы.
Расмий органдардын кабарлашынча, Сириядагы согушка катышуу үчүн кеткен кыргыз жарандарынын саны 600гө жетип, кийин токтой баштады. (RK)