АКШда почта аркылуу жөнөтүлгөн эки шектүү таңгак табылды
АКШнын Флорида штатында полиция демократ-сенатор Кори Букерге жолдонгон шектүү таңгакты таап алды.
Бул маалыматты ФБР да тастыктады. Ушундай эле таңгак жума күнү эртең менен Нью-Йорктогу почтадан табылган. Бышыктала элек маалыматтарга караганда, ал Улуттук чалгындоо мекемесинин мурдагы башчысы Жеймс Клэпперге жиберилген.
Болжол менен бул эки кутучада да колго жасалган жардыргыч заттар бар болгон. Акыркы бир нече күндө президент Дональд Трамптын көрүнүктүү сынчыларына ушундай эле 10 таңгак жөнөтүлгөн.
Атап айтканда, экс-президенттер Барак Обама жана Билл Клинтон, мурдагы вице-президент Жо Байден, актер Роберт де Ниронун дарегине колго жасалган бомбалар жеткирилген же жеткирүүгө аракет жасалган.
Жардыргыч заттардан эч ким жабыркаган эмес. Тергөө жүрүп жатат. Тартип коргоочулар посылкалардын бардыгын бир эле киши, бир эле жерден, болжол менен Флоридадан жөнөтүп турган деп эсептешет. Анын кандай себеп менен салып жатканы белгисиз.
Бир катар маалымат каражаттары жана саясий оппоненттер президент Дональд Трампты жана анын тарапташтарын жек көрүүгө шыкак берип, зомбулук маанайын жайылтып жатат деп айыпташууда. Трамп өз кезегинде өзүн сындаган прессаны зомбулукка чакырууда деп эсептейт.