Ондогон маданий ишмерлер Сенцовду бошотууну талап кылышты
Кат орус президенти Владмир Путиндин Биринчи Дүйнөлүк согуштун аяктагынана жүз жыл болгонуна байланыштуу Францияга сапарын утурлай Le Monde гезитине жарыяланды.
Ага режиссерлор Жан-Люк Годар, Аки Каурисмяки, Сергей Лозница, Андрей Звягинцев баш болгон белгилүү актер, тарыхчы, жазуучулар жана саясатчылар кол койгон. Алар Орусиянын абагында жаткан Сенцовду жана башка украин саясий туткундарын бошотуу үчүн бардык дипломатиялык жолдорду колдонууну суранышкан. Бул аракеттен майнап чыкпаса, “Магнитский мыйзамына” үндөш кадамдарды кабыл алууну сунуш кылып жатышат.
Парижде бүгүн, 10-ноябрда Сенцовду бошотууну талап кылган митинг өтөт.
Украиналык кинорежиссер аннексияланган Крымда 2014-жылы май айында кармалган. Кийин Орусиянын соту аны "жарым аралда теракт даярдаган" деген айып менен 20 жылга кескен. Сенцов күнөөсүн моюнуна алган эмес жана Орусия койгон айыпты толугу менен четке каккан. (КЕ)