Орусия ВИЧ илдети боюнча баяндамадагы маалыматтарды четке какты
Орусиянын саламаттык сактоо министри Вероника Скворцованын 29-ноябрда журналисттерге маалымдашынча, өткөн жылы ВИЧ илдетин жаңы жуктуруп алгандардын саны баяндамада айтылгандай, 104 000 эмес, 85 миң 802 адам болгон.
Саламаттык сактоо министрлиги жана Роспотребнадзор мекемеси баяндамадагы маалыматтар бурмаланган деп эсептейт. Алар муну Европанын башка мамлекеттерине караганда, Орусияда адамдар ВИЧ тесттен көп өтөрү менен түшүндүрүшкөн.
Саламаттык сактоо министрлиги жана Роспотребнадзор мекемесинин биргелешкен билдирүүсүндө бир жыл ичинде Орусия жарандарынын 30 пайызы ВИЧ илдети боюнча текшерилери, ал эми башка европалык мамлекеттерде бул көрсөткүч 10 пайыз гана экени белгиленген.
"Эгер Орусия Федерациясындагыдай болуп ушунча сандагы адам текшерилсе, Европанын башка мамлекеттеринде ВИЧтин таралышы мындан да көп болмок" деп айтылат маалыматта. 2018-жылы Европада 160 миң адамдан ар кандай жыныстык жугуштуу оорулар табылган.
Алардын 104 миңи Орусияда катталган. Баяндаманын авторлорунун ырасташынча, Орусияда ар бир 100 миң адамга ВИЧ илдетин жуктурган 71 киши туура келет. Украина, Орусия жана Европанын Чыгышындагы башка мамлекеттерде ВИЧ илдетинин жуктуруп алгандар көп катталат.
Дүйнөлүк саламаттык сактоо уюмунун божомолунда жалпы абал 2030-жылы Европада ВИЧ/СПИД илдетин такыр жоюу боюнча коюлган максат ишке ашпай турганын көрсөтүүдө.