Индонезияда цунаминин курмандыктары 160тан ашты
Индонезияда жанар тоо атылгандан кийинки цунамиде каза болгондордун саны 168ге жетти. Бери дегенде 750 адам жараат алды. Бул тууралуу өлкөнүн Табигый кырсыктардын кесепетин жоюу боюнча агенттигинин өкүлү Сутопо Нугрохо билдирди.
“Жергиликтүү убакыт боюнча саат 13:00гө карата цунамиде каза болгондордун саны 168 болду”, - деди ал. “Детик” маалымат порталы жазгандай, 30га жакын адамдын дайыны чыкпай жатат.
Ява жана Суматра аралын бөлүп турган Зонд кысыгында цунами жекшембиге караган түнү катталган. Куткаруучулар ага Кракатау жанар тоосунун атылышы себеп болушу ыктымал экенин билдирип жатат.