Жапония: Олимпиада комитетинин президенти коррупциянын айынан кызматтан кетет
Цунэкадзу Такэда сингапурдук «Black Tidings» консалтинг компаниясына эки миллион долларлык келишимге кол койгонун мойнуна алып, анын коррупцияга байланышы жок экенин жүйө кылды. Француз тергөөчүлөрү бул компания менен Эл аралык Олимпиада комитетинин мурдагы мүчөсү Ламин Диактын уулу тыгыз байланышта болгонун аныкташкан. Диак өзү 2015-жылы «паракорчулукка» жана «арам акчаны адалдоого» байланыштуу жаңжалдан кийин кызматтан кетүүгө аргасыз болгон.
Ламин Диак Олимпиада комитетинин Африкадагы мүчөлөрүнө таасири күч болгону айтылып келет. 2013-жылы комитет Мадрид менен Стамбулдун арыздарын четке кагып, жайкы оюндарды Токиодо өткөрүүгө добуш берген.
Жапония 2020-жылы жайкы Олимп оюндарын өткөрүш үчүн 20 миллиард доллар бөлгөн.