Жолдубаева, Ниязов жана Атамбаевдин жансакчылары милицияда кармалып турат
“Мага Кундуз жазыптыр ИИМге алып келди деп. Бирок аларды кандай негизде кармап отурганы айтыла элек. Убактылуу кармалуудабы же кандайдыр бир күнөө койгону жатабы белгисиз. Ал эми Атамбаевдин жактоочусу УКМКга кирип кетти”
Мурдагы президент Алмазбек Атамбаевди кармоо операциясы бүгүн 8-августта кечки саат төрттө башталган. Милиция темир дарбазаны чопкутталган машине менен сүзүп кирип, Атамбаевдин тарапташтарын короодон сыртка сүрүп чыгарган. Анда кулак тундуруучу, көздөн жаш агызуучу каражаттар колдонулганын «Азаттыктын» кабарчысы окуя болгон жерден кабарлаган.
ИИМ мажбурлап алып келүү боюнча биргелешкен иш-аракеттердин натыйжасында Кыргызстандын мурдагы президенти Алмазбек Атамбаев кармалганын маалымдаган. (TSh)