Путин менен Меркелдин жолугушуусу Москвада өтүүдө
Сүйлөшүү учурунда Жакынкы Чыгыштагы кырдаалга басым жасалары айтылган.
Буга чейин Кремл жолугушууда Сириядагы, Ливиядагы жана АКШ Багдад аэропортуна урган соккудан соң Жакынкы Чыгышта курчуган кырдаал тууралуу сөз болору айтылган.
Немис өкмөтүнүн өкүлү Штеффен Зайберт ушул жума башында Ангела Меркел орус президенти Путин менен Жакынкы Чыгыштагы “соңку маселелерди” талкуулоону көздөп жатканын билдирген.
3-январда Ирандын таасирдүү генералы Касем Сулейманинин Багдадда америкалык авиациянын соккусунан мерт болушу Жакынкы Чыгыштагы абалды курчуткан. Буга 176 жүргүнчүсү менен Тегеранда кулаган украиналык учакты Ирандын ракета менен атканы кошул-ташыл болуп, учурда кырдаалдын кесепети оор болушу ыктымал деген божомолдор айтылууда.
Путин менен Меркел акыркы жолу өткөн айда Францияда Украинанын чыгышындагы кырдаалды талкуулоо үчүн жолуккан.