Эрдоган Ливиянын дүйнөлүк коомчулук тааныган лидери менен жолукту
Эки лидердин жекшембидеги жолугушуусу Ливияда жаатташкан тарапташтардын ортосунда ок атышууну токтоткон макулдашуу күчүнө кирген күнү болду.
Москва жана Анкаранын сунушу менен эки тараптын ортосунда биринчи жолу мындай жараян киргизилди. Орусиянын президенти Владимир Путин менен Эрдоган өткөн жумада Стамбулда жолугушукан соң чогуу билдирүү жасап, Ливиядагы согушуп жаткан тараптарды мунаса келүүгө чакырышкан.
Ливияда 2011-жылы жарандык согуш башталып, өлкө лидери Муаммар Каддафи өлтүрүлгөндөн бери кош бийлик сакталып турат. Өлкөнүн чыгышын парламент жана генерал Халифа Хафтар жетектеген армия көзөмөлдөйт. Ал эми батышы эл аралык коомчулук тааныган Улуттук ынтымак өкмөтүнүн карамагында.
БУУнун колдоосу менен түзүлгөн бул өкмөт баш калаа Триполиде жайгашкан. Хафтардын бийлигин Бириккен Араб Эмираттары, Египет, Орусия колдой тургандыгы айтылып келет. Орусия Ливиядагы чатакка тиешеси бар экенин такай четке кагып келгени менен Хафтар тарапта орусиялык жалданма аскерлер согушуп жүргөнүнүн далилдери айтылган.