БШКнын жумушчу тобу Нарында тартылган тасма боюнча иликтөө баштады
Буга чейин социалдык тармактарга тарап, кызуу талкууга алынган тасмадан Нарын районунун Чет-Нура айыл аймагынын башчысы Азамат Мүсүркановго окшош адам топтошкон эл менен сүйлөшүп жатканын көрүүгө болот. Ал жерде "Биримдик" саясий партиясынан шайлоого аттанган талапкер Улан Бакасов менен соодалашуу болгонун, ал үчүн айылдан кеминде 300 добуш керек экени айтылат. Видеонун биринде айыл тургундары дептерге аты жөнүн жазып, кол коюп жатканы тартылган.
Тасмада аты аталган айыл өкмөт башчы Азамат Мүсүркановдон комментарий алууга мүмкүн болбоду. "Биримдик" партиясынын талапкерлер тизмесинде алтынчы болуп турган Улан Бакасов да маалымат бере элек. Анын расмий өкүлү Майрамбек Өмүрбаев "Фейсбук" аркылуу видеодо айтылгандарды четке какты жана аны "каралоо" деп баалады.
Нарын районунун бийлиги бул тасма боюнча териштирүү жүрүп жатканын маалымдады.
120 мандаттуу Жогорку Кеңешке шайлоого катышуу үчүн 17 партия БШКга документ тапшырган. Эреже боюнча партиялар үгүттү шайлоого бир ай калганда, 4-сентябрда башташы керек. Парламенттик шайлоо 4-октябрга белгиленген.