Орус бийлиги Навальныйды экинчи ирет да уулантууга далалат кылган
Алексей Навальный учактын ичинде комага түшүп калган. Оболу аны Томск шаарынан Москвага учурушкан, бирок жолдо учкучтарга жакыныраак шаар болгон Омск шаарынын аба майданына учакты кондуруу тууралуу буйрукту аткарууга туура келген.
«Тез жардам» унаасы менен келген дарыгерлер тобу Навальныйга ууга каршы антидот катары дары зат сайышкан. Кийин аныкталгандай, иш жүзүндө буга чейинки уу – нервди жабыркатуучу аскердик заттын «Новичок» аттуу түрү болгон.
«Таймс» басылмасынын айтымында, Омскидеги сайылган антидот Навальныйга карата жасалган экинчи уулантуу аракетинен да анын организмин сактап калган. Бул тууралуу «Таймс» гезитине Улуу Британиянын химиялык, биологиялык, радиациялык жана өзөктүк куралдарга каршы күрөш боюнча атайын аскер бөлүгүнүн мурдагы жетекчиси айтып берген.
Анын ууланганын айтышкан жакындары Навальныйды чет мамлекетке которууну талап кылышып, бир нече күндөн кийин ал Берлиндеги «Шарите» ооруканасына которулган.
Расмий Кремль өзүнө карата айтылган "Навальныйды уулантты" деген доолорду четке кагып келет. (TT)