Бишкек ЖЭБ керектелүүчү көмүрдүн 15% менен камсыз болду
“Акыркы күндөрү көмүр ташып келүүдө кечигүү бар, бирок такыр токтоп калды деген туура эмес. Кыргыз тараптан дагы, Казакстандан да ташып келүү уланып жатат. Ушул тапта күнүнө 5 миң тоннадан көмүр ташылып келүүдө. Азыркы көлөм Бишкек ЖЭБин кеминде бир-эки ай үзгүлтүксүз иштетип турууга жетет. Муктаждыкка жараша дагы ташылып келип турат”,- деди Айталиев.
Башкалаанын ЖЭБинин көмүрдү жылдык керектөөсү 1 млн. 650 миң тоннаны түзөт. Министрдин орун басары келтирген көлөм мунун 15% түзөт.
Талапка ылайык, керектелүүчү көмүрдүн миллион тоннасы жергиликтүү – Кара-Кеченин көмүрү болуш керек. Калганы Казакстандан импорттолот. ЖЭБ быйыл мындан сырткары “Газпром-Кыргызстандан” 68 миллион куб\метр газ алуу үчүн келишим түзгөн.
19-октябрда Жогорку Кеңештин депутаты Наталья Никитенко "Фейсбуктагы" баракчасына билдирүү таратып, Министрлер кабинетинин Бишкек ЖЭБине көмүр алып келүүнү казакстандык компанияга берүү тууралуу тескемени чыгарган. Ал тескемеге ылайык, "Электр станциялары" акционердик коомуна таандык Бишкек ЖЭБдин от казандарын тейлөө милдети да көмүр алып келе турган Hampton Resources Limited компаниясына берилет. Президенттин расмий сайтына 20-октябрда бул маалыматты тастыктаган түшүндүрмө чыгып, абага чыккан зыяндуу заттардын көлөмүн төмөндөтүү максатында ушундай чечим кабыл алынганы баяндалган.
2018-жылы январда ЖЭБде авария болуп, борбор калаа бир нече күн жылуулугу жок калган. Кийин ишкананын реконструкциясы боюнча "Коррупция" беренеси менен иш козголуп, айрым мурдагы жетекчилер соттолгон.
Кыргызстан боюнча жалпысынан жылына 3 млн. ашык тонна көмүр керектелет. Мунун 1 млн. тоннадан ашуун бөлүгү калкка туура келет. 21-октябрда парламенттин жалпы жыйынында белгилүү болгондой, ушул убакка чейин Кыргызстанда 500 миң тоннадай көмүр даяр болгон. (ErN)