Ошто дарыянын жээгинен студент кыздын сөөгү табылды
Ош шаарындагы Ак-Буура дарыясынын жээгинен 20-25 жаштагы кыздын сөөгү табылды. Бул тууралуу шаардык ички иштер башкармалыгынан 30-июнда кабарлашты.
Маалыматка караганда, милициянын ыкчам кызматкерлери маркумдун тек-жайын териштирип, ал Баткен районунун тургуну, Ош мамлекеттик университетинин медициналык коллежинин 2-курсунун студенти экенин такташкан. Кыздын сөөгүндө көгала тактар болгон.
Милиция кыздын зомбулукка кабылып-кабылбаганы экспертизанын жыйыныгы менен аныкталарын билдирди.
“Учурда маркумдун өлүмүнүн себептерин аныктоо боюнча атайын экспертиза дайындалды, ар тараптуу иликтөө иштери жүрүп жатат. Аткарылган иштер боюнча кийинчерээк кошумча маалымат берилет”, - деп жазылган кабарда.
Маркумдун жакындары азырынча комментарий бере элек.
Ушул жылдын 8-февралында да Ош шаарындагы медицина факультетинде окуган студент кыздын сөөгү табылган. Шектүү катары аны менен окуу жайда чогуу окуган жигит кармалган. (JsA\AAb)