Трамп сотто суроолорго жооп берүүдөн баш тартты
Америка Кошмо Штаттарынын мурдагы президенти Дональд Трамп көрсөтмө бериш үчүн 10-августта Нью-Йорктогу сотко барды. Ага каржылык алдамчылык үчүн айып тагылган.
Соттун маалыматына караганда, Трамптын компаниялары көп суммадагы насыяларды алуу үчүн активдерин – мейманканаларын, гольф клубдарын жана башка кыймылсыз мүлктөрүн кымбат баалаган. Ошол эле кезде салык төлөөдөн качыш үчүн кирешени аз көрсөткөн.
Дональд Трамп сотто өзүнө жана үй-бүлө мүчөлөрүнө каршы көрсөтмө бербөөгө мүмкүндүк берген Конституциядагы укугунан пайдаланып суроолордун көбүнө жооп берүүдөн баш тартты. Трамп ага саясий негизде иш козголгонун, ал Республикалык партияга мүчө экенин, ал эми ишти караган судья Летитиа Жеймс Демократиялык партиядан экенин айтты.
Дүйшөмбү күнү кечинде Федералдык иликтөө бюросу (ФБР) Дональд Трамптын Флорида штатындагы Мар-а-Лаго резиденциясында тинтүү жүргүзгөн. Жалпыга маалымдоо каражаттары мурдагы президент Ак үйдөн ала кеткен документтер, анын ичинде жашыруун документтер тинтүүгө негиз болгонун жазышкан.
Дональд Трамп Америка Кошмо Штаттарын 2017-2020-жылдары башкарган. Ал 2020-жылы 3-ноябрда өткөн президенттик шайлоодо азыркы президент Жо Байденге жеңилип калган.