"Билим айтышта" төкмө акын Кутман Садыбакасов жеңди
Бишкекте төкмө акындардын медиасабаттуулукка арналган "Билим айтыштын" финалында Кутман Садыбакасов 1-орунду алып, ага 85 миң сом сыйлык ыйгарылды. 2-орунду ээлеген Жылдызбек Төрөканов 65 миң сом, 3-орунду алган Баян Акматов 45 миң сом алды. Андан тышкары, бардык катышуучуларга 15 миң сомдон берилди.
Ошондой эле "Ак таңдай" коомдук фонду жасатып келген "Алтын комуз" сыйлыгы Жылдыз Төрөкановго тапшырылды. Internews уюмунун Кыргызстандагы өкүлчүлүгү уюштурган иш-чара 13-августта кечинде "Ынтымак-2" эс алуу багында өттү.
Аталган уюм 2022-жылдын январында “Билим айтыш” долбоорун баштаган. Анда төкмө акындар медиасабаттуулук жана алардын чыгармачылыгын социалдык тармактарда жайылтууну үйрөнүштү.
Жума сайын 21 төкмө акындан (19 эркек, эки аял) турган топко медиасабаттуулук боюнча контент түзүү сунушталып, мыкты чыгармаларды комиссия тандап, финалисттер Instagram, TikTok жана Facebook социалдык түйүндөрүндө элдин добушу менен аныкталып келген. Ал эми финалда жеңүүчүлөрдү Түгөлбай Казаков, Аймен Касенов өңдүү коомдук, маданий ишмерлерден турган калыстар тобу тандашты. (MZh)