Акжол Махмудов: Кыргыз күрөшүнүн мектебин көрсөттүм (видео)
Сербиянын Белград шаарында өтүп жаткан күрөш боюнча Дүйнө чемпионатында алтын медал тагынган балбан Акжол Махмудов жеңишин кыргыз элине арнаганын, бардык күйөрмандарынын колдоосуна ыраазычылыгын айтты.
Анын күрөштөн кийинки кыскача маегин Дене тарбия жана спорт департаменти Инстаграм баракчасында жайгаштырды. Махмудов беттеш жөнүндө пикирин айтып жатып, дүйнөгө кыргыз күрөшүнүн мектебин көрсөткөнүн билдирди.
“Мен кечээ дагы айткам, кыргыз күрөшүнүн мектебин көрсөткүм келет деп. Мен көрсөттүм, жеңдим”, - деди Махмудов.
11-сентябрда финалдык таймашта ал грек-рим күрөшүнөн 77 кг. салмакта венгриялык Золтан Леваини 8:0 эсебинде мөөнөтүнөн мурда утуп, дүйнө чемпиондугун жеңди. Мажар балбаны менен Акжол Махмудов буга чейин эки жолу беттешип, бир жолу жеңип, бир ирет утулган.
Махмудовдун жеңиши менен президент Садыр Жапаров Фейсбуктагы баракчасында куттуктоо билдирүүсүн жазды.
Бул салмакта таймаштар 10-сентябрда башталган. Ал күнү Акжол Махмудов төрт атаандашын утуп, финалга чыккан. Алгач бразилиялык Жоилсон Де Брито Рамос Жуниорду 11:1, 1/8 финалда мексикалык Эммануэл Алексис Бенитес Кастрону 8:0, чейрек финалда түркиялык Юнус Емре Басарды 9:7 эсебинде жеңип алган. Жарым финалда Лондон Олимпиадасынын чемпиону, 34 жаштагы түштүк кореялык Ким Хён У менен күрөшүп, 4:1 эсебинде уткан.
Акжол Махмудов грек-рим күрөшүнөн Дүйнө чемпиондугун жеңген алгачкы кыргызстандык спортчу болуп калды. Буга чейин күрөштүн бул түрүнөн Канатбек Бегалиев (2006) менен Жоламан Шаршенбеков (2018, 2021) күмүш байге алган. Ал эми Раатбек Санатбаев (1999) менен Данияр Көбөнөв (2010) коло медаль уткан. Махмудов жалпы эле күрөш түрлөрүнөн Дүйнө чемпиону аталган үчүнчү кыргызстандык. Буга чейин кыз-келиндер күрөшүнөн Айсулуу Тыныбекова эки жолу (2019, 2021), Мээрим Жуманазарова бир жолу (2021) Дүйнө чемпиондугун жеңген.
23 жаштагы Акжол Махмудов Дүйнө чемпионатына алгачкы жолу катышты. Ал чоңдор арасында Азиянын эки жолку чемпиону. Токио Олимпиадасынын күмүш байгесинин ээси (2021). IV Ислам шериктештиги оюндарынын жеңүүчүсү. Кадеттер арасында Дүйнө чемпионатынын алтын (2016), жаштар арасында Дүйнө чемпионатынын күмүш (2017), коло байгелерин жеңген. Уландар (2016) жана жаштар (2017) арасында Азиянын чемпиону.
Күрөш боюнча (грек-рим күрөшү, эркин күрөш жана кыз-келиндер күрөшү) Дүйнө чемпионаты 18-сентябрга чейин уланат. Кыргызстандан бул мелдешке 15 спортчу катышат.
11-сентябрда кыргызстандык Тынар Шаршенбеков (63 кг.), Амантур Исмаилов (67 кг.) жана Бексултан Махмудов (97 кг.) күч сынашып, жарым чейрек жана чейрек финалда атаандаштарына жеңилишкен. Алардын атаандаштары финалга чыккандыктан, кыргыз балбандары 12-сентябрда коло байге үчүн күрөшүүгө жол ача турган жооткотуучу таймаштарга чыгууга мүмкүнчүлүк алды.
12-сентябрда күрөштүн бул түрүнөн 60 кг. салмакта Дүйнө чемпионатынын эки жолку күмүш байгесинин ээси Жоламан Шаршенбеков күч сынашат. Ошондой эле кыз-келиндер күрөшүнөн 62 кг. салмакта дүйнөнүн эки жолку чемпиону Айсулуу Тыныбекова таймашка чыгат. (TSh)