Грузияда депутаттын сөөгү өз үйүнөн табылды
Грузия парламентиндеги башкаруучу “Грузин кыялы” партиясынын депутаты Ираклий Хахубианын Тблисидеги үйүнөн сөөгү табылганы кабарланууда. Бул тууралуу “Азаттыктын” грузин кызматы жазды.
Өлкөнүн Ички иштер министрлиги 27-октябрда кабарлагандай, депутаттын өлүмүнө байланыштуу кылмыш иши козголуп, иликтөө башталган.
Маркумдун жанынан ок атуучу курал табылган. Башкы версия катары өзүнө-өзү кол салышы мүмкүн экени каралууда. Ошол эле маалда киши колдуу болушу мүмкүн деген вариант дагы четке кагылган жок.
Жалпыга маалымдоо каражаттары жазгандай, 51 жаштагы Ираклий Хахубианын ден соолугу уулу каза болгон соң начарлап кеткен.
Депутаттын уулу, 21 жаштагы Беку Хахубиа 2017-жылы жол кырсыгынан кийин полициядан качып бараткан маалда каза болгон. 2019-жылы бул кылмышка байланыштуу эки полиция кызматкери эки жылга камакка алынган. (ErN)