Кызыл-Жардагы психиатриялык ооруканадан качкан бейтап тогуз күндөн бери табылбай жатат
20-ноябрга караган түнү Таш-Көмүр шаарына караштуу Кызыл-Жар-12 шаарчасында жайгашкан Республикалык психиатриялык ооруканасында дарыланып жаткан бейтап качып кеткен.
Ал Кылмыш-жаза кодексинин 114-беренеси ("Медициналык мүнөздөгү мажбурлоо чаралары жана мажбурлап дарылоо") менен дарыланып жаткан, теги Өзбекстандын Фергана облусунан.
Ал ооруканага соттун чечими менен 2022-жылдын 1-ноябрында жаткырылган.
Бейтапты милиция тогуз күндөн бери таппай жатканын "Азаттыкка" Жалал-Абад облустук ички иштер башкармалыгы тастыктады. Маалыматка ылайык, бул окуя” Эркиндигинен ажыратуу жайларынан же кайтаруудан качуу” беренесинин негизинде катталып, териштирүү иштери жүрүүдө.
Кызыл-Жардагы психиатриялык ооруканада соттун чечими менен жаткандар басымдуу. (TB)